आगामी फागुन २१ गते हुने प्रतिनिधि सभाको चुनावका लागि मोरङमा दुई वटा अस्थायी मतदान केन्द्र राख्न प्रदेश निर्वाचन कार्यालयले निर्वाचन आयोगलाई सिफारिस गरेको छ ।
दुई वटा मतदान केन्द्र थप भए सँगै मोरङमा ३ सय ६ वटा मतदान स्थल र ८ सय ९० वटा मतदान केन्द्र रहने भएको छ । निर्वाचनमा खटिने कर्मचारी र सुरक्षाकर्मीहरूका लागि आदर्श पुस्तकालयमा अस्थायी मतदान केन्द्र स्थापना गर्न सिफारिस गरिएको छ ।
अस्थायी मतदाताका लागि ५ हजार २ सय ८२ जनाको नामावली संकलन भएको र यसमा मोरङ कारागारका १ सय ६४ जना कैदी बन्दीले समेत नाम दर्ता गराएका छन् ।
यसैगरी मोरङ कारागारमा रहेका कैदी बन्दीका लागि एउटा अस्थायी मतदान केन्द्र सिफारिस गरिएको निमित्त प्रदेश निर्वाचन अधिकारी चोलाराज दंगालले जानकारी दिए ।
निर्वाचनमा खटिने कर्मचारीहरूले भने आफू खटिएको मतदान केन्द्रमा नै समानुपातिक तर्फ मतदान गर्न पाउनेछन् । मोरङमा अस्थायी मतदाता नामावलीमा रहेका कर्मचारी, सुरक्षाकर्मी र कैदी बन्दी तथा वृद्धाश्रममा रहेका आश्रित नागरिकहरूले अस्थायी मतदान केन्द्रमा समानुपातिक तर्फ मात्र मतदान गर्न पाउनेछन् ।
त्यसैगरि
आउदो निर्वाचनका लागि ७५ जिल्लामा निर्वाचन सामग्रीसहित मतपत्र पुर्याइएको छ ।
काठमाडौँ र भक्तपुरबाहेक सबै जिल्लामा मतपत्रसहितका सामग्री पुर्याइएको निर्वाचन आयोगले जनाएको छ ।‘पहिलो हुने निर्वाचित हुने’ र ‘समानुपातिक निर्वाचन प्रणाली’तर्फका मतपत्र ७५ जिल्ला पुर्याइएको आयोगका सहायक प्रवक्ता कुलबहादुर जिसीले जानकारी दिए । काठमाडौँ र भक्तपुरका निर्वाचन कार्यालयमा बिहीबार निर्वाचन सामग्री र मतपत्र पुर्याइने आयोगले जनाएको छ ।